Laura PAPRANIKU
Shkup, 8 mars - Pjesëtarë të njësit policor "Alfa" shkojnë nëpër shtëpitë e shqiptarëve, në pikë të natës, kërcënojnë, rrahin burra dhe gra, denoncohen dhe si përfundim shpëtojnë pa një ferrë në këmbë. Kjo është historia zhgënjyese e familjes Zeqiri nga fashit Jabollçishtë i Velesit, të cilët të dëshpëruar me "forcat e rendit" dhe "organet e drejtësisë", nuk e dinë nëse në këtë shtet ka ndonjë instancë tjetër, e cila mund t'ju sigurojë qytetarëve qetësinë në shtëpitë e tyre. "Më duhet të shkoj në Itali, ku punoj prej disa ditëve, por nuk e di ku ta gjejë atë forcë që të nisem, kur s'kam një vend të sigurt ku ta lë djalin dhe bashkëshorten", thotë Sevdil Zeqiri. Ai është me punë të përkohshme në Itali, prej ku siguron ekzistencën financiare të familjes, ndërsa kishte ardhur me nxitim prej atje, pas tmerrit që tregon se kishte parë familja e tij natën e 14 dhjetorit të vitit të kaluar. "Tre persona që ishin prezantuar si policë, pas mesit të natës kishin shkuar me të shara në shtëpinë e tonë dhe pasi baba kishtë hapur portën kryesore, ata kanë hyrë në oborrin e përbashkët ku gjenden shtëpia e ime dhe babës, i cili jeton me vëllain dhe nusen. Në këto momente, kur policët kishin nisur të kërcënojnë babën dhe vëllanë, nusja ime - Hanifja i ishte afruar nuses të vëllait ti qëndrojë afër, që ta qetësojë, mos frikohet sepse ishte edhe shtatzënë. Mirëpo, policët për të cilët dyshojmë se duhet të jenë të njësitit 'Alfa', e kanë zënë gruan time për fyti dhe e kanë mbështetur për muri. Kështu kanë vepruar edhe me babën tim dhe kanë rrahur edhe djalin tim 16-vjeçar, Zaferin", rrëfen ai. Sevdili, djali më i madh i Nevzat Zeqirit, për historinë ka kuptuar menjëherë atë natë, kur bashkëshortja e tij i ishte lajmëruar në telefon duke qarë.
"Prej Italie u paraqita në policinë e Çashkës, ku denoncova rastin dhe pas intervenimit të policisë, personat janë marrë dhe janë mbajtur një natë në stacionin policor të Çashkës", pohon Sevdili. Mirëpo, edhe pse në bazë të denoncimit, policët duhej të ndiqeshin penalisht, prokurorja e Velesit, Andonovska Milanova i ka shpallur të pafajshëm.
"Të hysh në mes të anës në shtëpinë e dikujt, të trishtosh njerëz të pafajshëm, ti rrahësh, të të zë policia në flagrancë dhe të dalësh i pafajshëm pas gjithë kësaj historie, kjo vetëm në Maqedoni mund të ndodhë", thotë i revoltuar Sevdail Zeqiri. Ai i tregon edhe emrat e policëve, duke numëruar Mane Ivanovskin, Llupco Cvetkovskin dhe Goran Bogdanovskin, të tre me banim në qytetin Shkupit, ndërsa për identitetin e tyre thotë se kanë kuptuar vetëm përmes Avokatit të Popullit. Pas kërkesës së ngritur prej familjes Zeqiri, Avokati i Popullit kishte kërkuar prej Ministrisë së Punëve të Brendshme që të japë sqarime për rastin. Kjo bëhet e ditur në informatën që Avokati i Popullit ka përgatitur në datën 29 janar 2010. Familja Zeqiri nga fshati Jabollçishtë akuzon se policët gangster, mund të ishin paguar nga familjarët e nuses së të vëllait, Samirës, pasi nuk ishin dakord për martesën e saj me Halitin. Çifti i ri bashkëshortor, Samira 16-vjeçare e gjysmë dhe Halitit 23-vjeçar, para disa ditëve humbën dhe fëmijën e tyre, mirëpo janë të vendosur të jetojë me njëri-tjetrin, pavarësisht kundërshtimeve të familjes së nuses. Dashuria duket se do ti sfidojë paragjykimet dhe mentalitetin e vrazhdë të atyre anëve.